europa

ജീവന്‍ തേടി പുതിയ ദൗത്യങ്ങള്‍

സാബു ജോസ്
sabuട്ടര്‍ സോളാര്‍ സിസ്റ്റത്തിലെ വാതക ഭീമന്‍ ഗ്രഹമായ ശനിയിലും, ശനിയുടെ ഉപഗ്രഹങ്ങളിലും നീണ്ട 13 വര്‍ഷം പര്യവേഷണം നടത്തിയ കസീനി സ്‌പേസ്‌ക്രാഫ്റ്റ് 2017 സെപ്തംബര്‍ 15 ന് ദൗത്യം അവസാനിപ്പിച്ചു. ശനിയുടെ ഉപഗ്രഹങ്ങളായ ടൈറ്റന്‍, എന്‍സിലാഡസ് എന്നിവയില്‍ ജീവന്‍ തിരയുകയായിരുന്നു കസീനി-ഹൈഗന്‍സ് ഇരട്ട സ്‌പേസ്‌ക്രാഫ്റ്റ് ദൗത്യത്തിന്റെ ലക്ഷ്യം. കസീനി ഒരു റോവറും, ഹൈഗന്‍സ് ലാന്‍ഡറുമാണ്. ഹൈഗന്‍സ് ടൈറ്റനില്‍ ഇറങ്ങി ചിത്രങ്ങള്‍ എടുത്ത് ഭൂമിയിലേക്ക് അയയ്ക്കുകയും ചെയ്തു. ടൈറ്റനിലെയും എന്‍സിലാഡസിലെയും സമുദ്രങ്ങളില്‍ ജീവന്‍ ഉദ്ഭവിക്കാനും നിലനില്‍ക്കുന്നതിനുമുള്ള സാധ്യതയുണ്ടെന്നാണ് കസീനി ദൗത്യം നല്‍കുന്ന സൂചന.
കസീനി ദൗത്യത്തിന്റെ തുടര്‍ച്ചയായി 2019 മുതല്‍ 2025 വരെയുള്ള കാലത്ത് അഞ്ച് ദൗത്യങ്ങളാണ് നാസ ശനിയിലേക്ക് വിക്ഷേപിക്കാനൊരുങ്ങുന്നത്. ശനിയുടെ ഉപഗ്രഹങ്ങളില്‍ ജീവന്‍ തിരയുകയാണ് ഈ ദൗത്യങ്ങളുടെയെല്ലാം ലക്ഷ്യം. നാസയുടെ ന്യൂ ഫ്രോണ്ടിയര്‍ ദൗത്യങ്ങളുടെ ഭാഗമായാണ് ഉപഗ്രങ്ങളുടെ വിക്ഷേപണം നടത്തുന്നത്.

dragon fly spacecraft
ഡ്രാഗണ്‍ ഫ്‌ളൈ
ശനിയുടെ ഉപഗ്രഹമായ ടൈറ്റനിലേക്ക് വിക്ഷേപിക്കുന്ന ദൗത്യമാണ് ഡ്രാഗണ്‍ ഫ്‌ളൈ. ഒരു ഹെലികോപ്ടറിനോട് സാദൃശ്യമുള്ള ഈ ന്യൂക്ലിയര്‍ ക്വാഡ്‌കോപ്ടറിന് ഹെലികോപ്ടറിലുള്ളതുപോലെ പ്രൊപ്പല്ലറുകളുമുണ്ടാകും. സൗരയൂഥത്തില്‍ ഭൂമിക്കു വെളിയില്‍, ഉപരിതലത്തില്‍ ദ്രാവകം നിറഞ്ഞു നില്‍കുന്ന ഏക ഗോളമാണ് ടൈറ്റന്‍. ഭൂമിയുടെ അന്തരീക്ഷത്തേക്കാള്‍ കട്ടിയുണ്ട് ടൈറ്റന്റെ അന്തരീക്ഷത്തിന്. ദ്രാവക മീഥേയ്ന്‍ ഒഴുകുന്ന അരുവികളും തടാകങ്ങളും കടലുകളും നിറഞ്ഞ ടൈറ്റന്റെ ഉപരിതലം ഒരു റോവര്‍ ദൗത്യത്തിന് അനുയോജ്യമല്ല. ലാന്‍ഡര്‍ ദൗത്യത്തിന്റെ പരിമിതി ഹൈഗന്‍സ് ദൗത്യത്തിലൂടെ തിരിച്ചറിഞ്ഞതുമാണ്. അതുകൊണ്ടാണ് ഡ്രാഗണ്‍ ഫ്‌ളൈ എന്ന ന്യൂക്ലിയര്‍ ക്വാഡ്‌കോപ്ടര്‍ വിക്ഷേപിക്കാന്‍ നാസ ഒരുങ്ങുന്നത്. ഒരു ഡ്രോണ്‍ ദൗത്യമെന്നും ഇതിനെ വിശേഷിപ്പിക്കാന്‍ കഴിയും. ടൈറ്റന്റെ ഉപരിതലത്തില്‍ ഇറങ്ങുന്ന പേടകം അവിടെ നിന്നും പറന്നുയര്‍ന്ന് വ്യത്യസ്ത ഇടങ്ങളില്‍ ഇറങ്ങി നിരീക്ഷണം നടത്തുന്നതിനായി രൂപകല്‍പന ചെയ്ത വാഹനമാണ്. 2019 ല്‍ വിക്ഷേപണം നടത്താനാണ് നാസ ഉദ്ദേശിക്കുന്നത്.

ഓഷ്യാനസ്
ടൈറ്റനിലേക്കുള്ള രണ്ടാമത്തെ ദൗത്യമാണ് ഓഷ്യാനസ്. 2020 ല്‍ വിക്ഷേപിക്കുന്ന ഓഷ്യാനസ് ഒരു ഓര്‍ബിറ്റര്‍ ദൗത്യമാണ്. കസീനി ദൗത്യത്തിന്റെ ബേസ് സ്റ്റേഷനായ ജെറ്റ് പ്രൊപല്‍ഷന്‍ ലബോറട്ടറിയാണ് ഈ ഓര്‍ബിറ്റര്‍ നിര്‍മിക്കുന്നതും നിയന്ത്രണം നിര്‍വഹിക്കുന്നതും. ടൈറ്റന്റെ ഭ്രമണപഥത്തില്‍ പ്രവേശിക്കുന്ന പേടകം ഉപഗ്രഹത്തിന്റെ വാസയോഗ്യമേഖലകളില്‍ ജീവന്റെ അടയാളങ്ങള്‍ തിരയും. അതിനുവേണ്ടി സവിശേഷമായി തയ്യാറാക്കിയ നിരവധി ശാസ്ത്രീയ ഉപകരണങ്ങള്‍ പേടകത്തിലുണ്ടാകും.
എന്‍സിലാഡസ് ലൈഫ് ഫൈന്‍ഡര്‍
കസീനി സ്‌പേസ്‌ക്രാഫ്റ്റ് ജലസാന്നിധ്യം തിരിച്ചറിഞ്ഞ ശനിയുടെ ഉപഗ്രഹമാണ് എന്‍സിലാഡസ്. 500 കിലോമീറ്റര്‍ വ്യാസമുള്ള ഈ ഉപഗ്രഹത്തിന്റെ ദക്ഷിണ ധ്രുവത്തില്‍നിന്ന് പുറപ്പെടുന്ന ദ്രാവക ജെറ്റുകളുടെ ചിത്രങ്ങള്‍ കസീനി പേടകം എടുത്തിട്ടുണ്ട്. ജലവും, ധൂളിയും, മീഥേയ്‌നും, കാര്‍ബണ്‍ഡയോക്‌സൈഡുമാണ് ഈ ജെറ്റിലുള്ളത്. ശനിയുടെ ഇ-റിംഗില്‍ പൊടിയും ഹിമവും നിറയ്ക്കുന്നതും ഈ ജെറ്റുകളാണ്. ശനിയുടെ ശക്തമായ വേല ബലമാണ് എന്‍സിലാഡസില്‍ നിന്നും ഇത്തരം ദ്രാവക ജെറ്റുകള്‍ പുറന്തള്ളാന്‍ കാരണം. ഉപഗ്രഹത്തിന്റെ ഉപരിതലത്തിന് കീഴിലുള്ള സമുദ്രങ്ങളില്‍ നിന്നാണ് ഉപ്പുരസമുള്ള ഈ ജലം പുറന്തള്ളപ്പെടുന്നതെന്ന് കരുതുന്നു. ശനി ഗ്രഹം സൃഷ്ടിക്കുന്ന ടൈഡല്‍ ഫ്‌ളെക്‌സിംഗ് കാരണം ഈ സബ്-സര്‍ഫസ് സമുദ്രത്തില്‍ ജീവന്‍ ഉദ്ഭവിക്കുന്നതിനും നിലനില്‍ക്കുന്നതിനും ആവശ്യമുള്ള താപനിലയുണ്ടാകും എന്നാണ് കരുതുന്നത്. അമിനോ അമ്ലങ്ങളുടെ സാന്നിധ്യവും ഈ സമുദ്രങ്ങളില്‍ ഉണ്ടാകുമെന്ന് പ്രതീക്ഷിക്കുന്നു. എന്‍സിലാഡസ് ലൈഫ് ഫൈന്‍ഡര്‍ പേടകം ഉപഗ്രഹത്തില്‍ നിന്ന് പുറപ്പെടുന്ന ദ്രാവക ജെറ്റിനിടയിലൂടെ സഞ്ചരിക്കുകയും അവയില്‍ അമിനോ അമ്ലങ്ങളുടെ സാന്നിധ്യമുണ്ടെങ്കില്‍ തിരിച്ചറിയുകയും ചെയ്യും. അമിനോ അമ്ലങ്ങളുടെ സാന്നിധ്യം ജീവന്റെ അടയാളമാണ് സൂചിപ്പിക്കുന്നത്. 2022 ല്‍ ആണ് ഈ ഓര്‍ബിറ്റര്‍ ദൗത്യം വിക്ഷേപിക്കുന്നത്.

എന്‍സിലാഡസ് ലൈഫ് സിഗ്‌നേച്ചേഴ്‌സ് ആന്റ് ഹാബിറ്റബിലറ്റി പ്രോബ്
2023 ല്‍ നാസ വിക്ഷേപിക്കുന്ന ഈ ഓര്‍ബിറ്റര്‍ ദൗത്യം എന്‍സിലാഡസ് ലൈഫ് ഫൈന്‍ഡര്‍ ദൗത്യത്തിന്റെ തുടര്‍ച്ചയാണ്. നാസയുടെ കീഴിലുള്ള എയിംസ് റിസര്‍ച്ച് സെന്ററാണ് ഈ ദൗത്യം നിയന്ത്രിക്കുന്നത്. ആസ്‌ട്രോ ബയോളജിസ്റ്റുകളാണ് ഈ ദൗത്യത്തിന് പിന്നിലുള്ളത്. ഭൗമേതര ജീവന്‍ തിരയുന്ന ശാസ്ത്രശാഖയാണ് ആസ്‌ട്രോബയോളജി എന്നും എക്‌സോ ബയോളജി എന്നും അറിയപ്പെടുന്നത്.

സാറ്റേണ്‍ പ്രോബ് ഇന്റീരിയര്‍ ആന്റ് അറ്റ്‌മോസ്ഫിയര്‍ എക്‌സ്‌പ്ലോറര്‍
ശനിയുടെ അന്തരീക്ഷത്തിലേക്ക് ഇറങ്ങിച്ചെന്ന് അന്തരീക്ഷഘടന പഠിക്കുന്നതിനായി രൂപകല്‍പന ചെയ്ത ഓര്‍ബിറ്റര്‍ ദൗത്യമാണിത്. ഗ്രഹത്തിന്റെ ഭ്രമണപഥത്തില്‍ പ്രവേശിക്കുന്ന പേടകം ഏതാനും പ്രദക്ഷിണങ്ങള്‍ക്കും ശേഷം പാരച്യൂട്ട് ഉപയോഗിച്ച് ഗ്രഹത്തിന്റെ അന്തരീക്ഷത്തിലേക്ക് ഇറങ്ങിച്ചെല്ലും. കസീനി ദൗത്യംപോലെ ഒരു ദീര്‍ഘകാല പര്യവേഷണ പദ്ധതിയല്ല ഇത്. 90 മിനിട്ട് നേരം മാത്രമേ പേടകം ഗ്രഹത്തിന്റെ അന്തരീക്ഷത്തില്‍ നിലനില്‍ക്കുകയുള്ളൂ. ഈ സമയം കൊണ്ട് ഗ്രഹാന്തരീക്ഷത്തിലുള്ള ചില വാതകങ്ങളുടെ, വിശേഷിച്ചും ഹീലിയത്തിന്റെ തോത് അളക്കും. ഗ്രഹാന്തരീക്ഷത്തിലുള്ള ഹൈഡ്രജന്റെയും ഹീലിയത്തിന്റെയും തോത് അളക്കുന്നത് ഗ്രഹരൂപീകരണത്തേക്കുറിച്ചും സൗരയൂഥത്തിന്റെ ഉദ്ഭവത്തെക്കുറിച്ചും സമഗ്രമായ ധാരണ ലഭിക്കുന്നതിന് സഹായിക്കും. കസീനി ദൗത്യത്തിന്റെ അവസാന ലാപ്പുകളില്‍ ഇതിനുള്ള ശ്രമം നടത്തിയിരുന്നുവെങ്കിലും അത് വിജയകരമായിരുന്നില്ല. 1995 ല്‍ നാസയുടെ ഗലീലിയോ സ്‌പോസ് ക്രാഫ്‌ററില്‍ നിന്ന് വിക്ഷേപിച്ച ഒരു അറ്റ്‌മോസ്ഫിയര്‍ പ്രോബ് ഉപയോഗിച്ച് വ്യാഴത്തിന്റെ അന്തരീക്ഷത്തിലുള്ള വാതകങ്ങളുടെ തോത് കണ്ടെത്താന്‍ ശ്രമം നടത്തിയിരുന്നു. ഇത് ഭാഗികമായി വിജയമായിരുന്നു. 2025 ലാണ് സാറ്റേണ്‍ പ്രോബ് ഇന്റീരിയര്‍ ആന്റ് അറ്റ്‌മോസ്ഫിയര്‍ എക്‌സ്‌പ്ലോറര്‍ വിക്ഷേപിക്കുന്നത്.
ഔട്ടര്‍ സോളാര്‍ സിസ്റ്റത്തില്‍ ഭൗമേതര ജീവന് സാധ്യതയുള്ള ഇടങ്ങള്‍ ശനിയുടെ ഉപഗ്രഹങ്ങള്‍ക്ക് പുറമെ വ്യാഴത്തിന്റെ ഉപഗ്രഹങ്ങളാണ്. വ്യാഴത്തിന്റെ ഗലീലിയന്‍ ഉപഗ്രങ്ങളായ യൂറോപ്പ, കലിസ്റ്റോ, ഗാനിമിഡെ എന്നീ ഉപഗ്രഹങ്ങളിലാണ് ജീവന്‍ തിരയുന്നതിനുവേണ്ടി നാസയും യൂറോപ്യന്‍ സ്‌പേസ് ഏജന്‍സിയും ചേര്‍ന്ന് ഉപഗ്രഹവിക്ഷേപണം നടത്തുന്നത്.

ജ്യൂസ്
നാസ-യൂറോപ്യന്‍ സ്‌പേസ് ഏജന്‍സി സംയുക്ത സംരംഭമാണ് ജ്യൂസ്. 2022 ല്‍ ആണ് ഈ ഓര്‍ബിറ്റര്‍ ദൗത്യം വിക്ഷേപിക്കുന്നത്. കട്ടികൂടിയ ഹിമാവരണമുള്ള യൂറോപ, കലിസ്റ്റോ, ഗാനിമിഡെ എന്നീ വലിയ ഉപഗ്രഹങ്ങളെയാണ് ജ്യൂസ് നിരീക്ഷിക്കുന്നത്. ഈ ഉപഗ്രഹങ്ങളുടെ അന്തരീക്ഷ ഘടനയും കാന്തികക്ഷേത്രവും പേടകം പഠനവിധേയമാക്കും. കൂടാതെ പേടകത്തിലുള്ള റഡാര്‍ സംവിധാനം ഉപയോഗിച്ച് ഉപരിതല പാളി തുളച്ചുകടന്ന് ഉപരിതലത്തിനടിയിലുള്ള ജലാശയങ്ങളേക്കുറിച്ച് പഠിക്കുന്നതിനും ഈ ദൗത്യത്തിന് കഴിയും. ഈ മൂന്ന് ഉപഗ്രഹങ്ങളുടെയും ഉപരിതലത്തിന് കീഴെ ജലാശയങ്ങളുണ്ടെന്ന് തിരിച്ചറിഞ്ഞിട്ടുണ്ട്. വ്യാഴത്തിന്റെ ടൈഡല്‍ ഫ്‌ളക്‌സിംഗ് കാരണം ഈ സബ്-സര്‍ഫസ് സമുദ്രങ്ങളില്‍ ജീവന്‍ ഉദ്ഭവിക്കുന്നതിനുള്ള താപനില ഉണ്ടാകുമെന്നാണ് കരുതുന്നത്. സൂക്ഷ്മ ജീവികളുടെ സാന്നിധ്യമാണ് ഈ സമുദ്രങ്ങളില്‍ പ്രതീക്ഷിക്കുന്നത്. 1.5 ബില്യണ്‍ ഡോളറാണ് പദ്ധതിയുടെ ചെലവ് പ്രതീക്ഷിക്കുന്നത്. 2029 ല്‍പേടകം വ്യാഴത്തിന് സമീപമെത്തും.

യൂറോപ ക്ലിപ്പര്‍
വ്യാഴത്തിന്റെ ഉപഗ്രഹങ്ങളില്‍ ജീവന്‍ ഉദ്ഭവിക്കുന്നതിനും നിലനില്‍ക്കുന്നതിനും ഏറ്റവുമധികം സാധ്യതയുള്ളത് യൂറോപയിലാണ്. യൂറോപയുടെ സബ്-സര്‍ഫസ് സമുദ്രങ്ങള്‍ ഇതിന് അനുയോജ്യമാണെന്നാണ് കരുതുന്നത്. അതുകൊണ്ടു തന്നെ യുറോപയിലേക്ക് മാത്രമായി നാസ വിക്ഷേപിക്കുന്ന സവിശേഷ ഓര്‍ബിറ്റര്‍ ദൗത്യമാണ് യൂറോപ ക്ലിപ്പര്‍. 2 ബില്യണ്‍ യു.എസ് ഡോളര്‍ ചെലവ് വരുന്ന ഈ ദൗത്യം 2022 ല്‍ വിക്ഷേപിക്കും. 2025 ല്‍ പേടകം വ്യാഴത്തിന്റെ ഭ്രമണപഥത്തില്‍ പ്രവേശിക്കും തുടര്‍ന്നുള്ള നിരവധി വര്‍ഷക്കാലം പേടകം യൂറോപയെ പ്രദക്ഷിണം ചെയ്യും. യൂറോപയുടെ ഉപരിതലത്തിലെ ഹിമാവരണം തുളച്ചുകടന്ന് പരീക്ഷണം നടത്താന്‍ കഴിയുന്ന ഒന്‍പത് ശാസ്ത്രീയ ഉപകരണങ്ങള്‍ പേടകത്തിലുണ്ടാകും.

clipper

യുറാനസിലേക്കും നെപ്ട്യൂണിലേക്കും
ഔട്ടര്‍ സോളാര്‍ സിസ്റ്റത്തില്‍ ജീവന്‍ തേടിയുള്ള അന്വേഷണം അവിടെയും തീരുന്നില്ല. 2025 നും 2030 നും ഇടയില്‍ യുറാനസിന്റെയും നെപ്ട്യൂണിന്റെയും ഉപഗ്രഹങ്ങളില്‍ ജീവന്‍ തേടിയുള്ള ദൗത്യങ്ങള്‍ വിക്ഷേപിക്കുമെന്ന് നാസയും യൂറോപ്യന്‍ സ്‌പേസ് ഏജന്‍സിയും പ്രഖ്യാപിച്ചിട്ടുണ്ട്. ഇക്വിനോക്‌സ് ദൗത്യങ്ങള്‍ എന്നറിയപ്പെടുന്ന ഇത്തരം ദൗത്യങ്ങള്‍ നടത്തുന്നത് ഗ്രഹങ്ങളുടെ ഓര്‍ബിറ്റല്‍ പ്ലെയിനില്‍ ക്രമീകരണം നടക്കുന്ന അവസരങ്ങളിലാണ്. ഗ്രാവിറ്റേഷണല്‍ അസിസ്റ്റ് ഫ്‌ളൈബൈ ഉപയോഗിച്ച് വലിയ ഗ്രഹങ്ങളുടെ ഗുരുത്വാകര്‍ഷണ ബലത്തിന്റെ സഹായത്തോടുകൂടിയാണ് വലിയ ദൂരങ്ങളിലേക്കുള്ള ദൗത്യങ്ങള്‍ വിക്ഷേപിക്കുന്നത്.

Facebook Comments

About admin

Leave a Reply

Your email address will not be published. Required fields are marked *

*