Cassini_Proximals_HiRes02_vB (1)

കസീനി ഇനി ചരിത്രം

സ്വന്തം ലേഖകന്‍
കസീനി ഇനി ചരിത്രത്തിന്റെ ഭാഗമാവുകയാണ്. നാസയുടെ ഭാഷയില്‍ കസീനി സ്‌പേസ്‌ക്രാഫ്റ്റ് അതിന്റെ ഗ്രാന്‍ഡ് ഫൈനല്‍ ആരംഭിച്ചു. ഇപ്പോള്‍ പേടകം ശനിയുടെ വലയങ്ങള്‍ക്കും ഗ്രഹോപരിതലത്തിനും ഇടയിലാണ്. ഇനി 22 ആഴ്ചകള്‍, 22 ലാപ്പുകള്‍, അല്ലെങ്കില്‍ 22 പ്രദക്ഷിണങ്ങള്‍. 2017 സെപ്തംബര്‍ 15 ന് കസീനി ശനിയില്‍ ഇടിച്ചിറങ്ങും. ഗ്രഹാന്തരീക്ഷത്തില്‍ നിന്നും 2950 കിലോമീറ്റര്‍ മാത്രം ഉയരത്തിലാണ് പേടകം ഇപ്പോഴുള്ളത്. ഓരോ പ്രദക്ഷിണത്തിലും ഈ അകലം കുറഞ്ഞുവരും. ഇനി വരുന്ന 22 ആഴ്ചകളില്‍ ശനി ഗ്രഹത്തിന്റെ ഇതുവരെ കാണാത്ത വിസ്മയ ചിത്രങ്ങളായിരിക്കും കസീനി ഭൂമിയിലേക്കയക്കുക. ധൂളിയും ഹിമവും നിറഞ്ഞ വലയങ്ങളുടെ മറയില്ലാതെ ശനിയുടെ തനിനിറം ഇനി ശാസ്ത്രലോകത്തിനു മുന്നില്‍ അനാവരണം ചെയ്യപ്പെടും. കൂടാതെ ഗ്രഹത്തിന്റെ പിണ്ഡവും കൃത്യമായി കണക്കുകൂട്ടാന്‍ കഴിയും. ശനിയുടെ പിണ്ഡം ഇപ്പോള്‍ നമുക്കറിയാം. എന്നാല്‍ അത് ഗ്രഹത്തിന്റെയും അതിന്റെ വലയത്തിന്റെയും ചേര്‍ന്നുള്ള പിണ്ഡമാണ്. കസീനി പേടകം വലയത്തിനുള്ളില്‍ കടന്നതോടെ വലയങ്ങളുടെ പിണ്ഡം ഒഴികെയുള്ള ഗ്രഹപിണ്ഡം കൃത്യമായി കണക്കുകൂട്ടാന്‍ കഴിയും.
1997 ഒക്‌ടോബര്‍ 15 ന് ആണ് കസീനി ദൗത്യം വിക്ഷേപിക്കപ്പെടുന്നത്. ഇതൊരു ഇരട്ട പേടകങ്ങളുടെ ദൗത്യമായിരുന്നു. കസീനിയെന്നും ഹൈഗന്‍സ് എന്നും പേരുള്ള രണ്ട് കൃത്രിമ ഉപഗ്രങ്ങളായിരുന്നു ദൗത്യത്തില്‍ ഉണ്ടായിരുന്നത്. ശനി ഗ്രഹത്തെയും അതിന്റെ ഉപഗ്രഹങ്ങളെയും കുറിച്ച് പഠിക്കുന്നുതിനാണ് കസീനി വിക്ഷേപിച്ചതെങ്കില്‍ ശനിയുടെ ഉപഗ്രഹമായ ടൈറ്റനില്‍ ഇറങ്ങുകയായിരുന്നു ഹൈഗന്‍സ് ദൗത്യത്തിന്റെ ലക്ഷ്യം. ഏഴ് വര്‍ഷത്തെ യാത്രയ്‌ക്കൊടുവില്‍ 2004 ല്‍ കസീനി ശനിയുടെ സമീപമെത്തി. 2005 ജനുവരി 14 ന് ഹൈഗന്‍സ് സ്‌പേസ്‌ക്രാഫറ്റ് ടൈറ്റനില്‍ ഇറങ്ങി. ശനിയിലേക്കുള്ള യാത്രയില്‍ ഈ ഇരട്ടപേടകങ്ങള്‍ ശുക്രനെ രണ്ടുതവണ സന്ദര്‍ശിച്ചു. ശുക്രന്റെ ഗുരുത്വാകര്‍ഷണത്തില്‍ നിന്നും അധികപ്രവേഗം ആര്‍ജിക്കുന്നതിനു വേണ്ടിയായിരുന്നു ഇത്. പിന്നീട് 1999 ഓഗസ്റ്റ് 18 ന് പേടകം ചന്ദ്രന്റെ 1171 കിലോമീറ്റര്‍ അടുത്തെത്തി. ചന്ദ്രന്റെയും ശുക്രന്റെയും നിരവധി ചിത്രങ്ങള്‍ എടുത്തു. 2000 ജനുവരി 23 ന് 2685മാസര്‍സ്‌കി എന്ന ഛിന്നഗ്രഹത്തെ അവിചാരിതമായി സന്ദര്‍ശിച്ചു ചിത്രങ്ങളെടുത്തു. 2000 ഡിസംബര്‍ 30 ന് പേടകം വ്യാഴത്തിന് സമീപമെത്തി. ശനിയിലേക്കുള്ള യാത്രയ്ക്കുവേണ്ട പ്രവേഗം വ്യാഴത്തിന്റെ ഗുരുത്വാകര്‍ഷണത്തില്‍ നിന്ന് കടമെടുത്തതുകൂടാതെ വ്യാഴത്തിന്റെയും വ്യാഴത്തിന്റെ നിരവധി ഉപഗ്രഹങ്ങളുടെയും ചിത്രങ്ങളെടുത്തു. 2004 ജൂലൈ 1ന് ആണ് കസീനി ശനിയുടെ ഭ്രമണപഥത്തില്‍ പ്രവേശിച്ചത്. തൊട്ടടുത്തവര്‍ഷം 2005 ജനുവരി 14 ന് ഹൈഗന്‍സ് പേടകം ശനിയുടെ ഏറ്റവും വലിയ ഉപഗ്രഹമായ ടൈറ്റനില്‍ ഇറങ്ങി. മീഥേയ്ന്‍ സമുദ്രങ്ങളുള്ള ടൈറ്റനില്‍ ജിവന്‍ തിരയുകയായിരുന്നു ഉദ്ദേശ്യം.
നാസ, യൂറോപ്യന്‍ സ്‌പേസ് ഏജസി, ഇറ്റാലിയന്‍ സ്‌പേസ് ഏജന്‍സി എന്നിവയുടെ സംയുക്ത സംരംഭമാണ് കസീനി ഹൈഗന്‍സ് ദൗത്യം. വാതകഭീമനായ ശനിയേകുറിച്ചും അതിന്റെ ഉപഗ്രങ്ങളേക്കുറിച്ചുമുള്ള പഠനമാണ് ഈ ദൗത്യം കൊണ്ട് ഉദ്ദേശിച്ചത്. 2010ല്‍ അവസാനിപ്പിക്കാന്‍ ഉദ്ദേശിച്ചിരുന്ന ദൗത്യം 2017 വരെ നീട്ടുകയായിരുന്നു. 2004 മുതല്‍ നീണ്ട 13 വര്‍ഷക്കാലം കസീനി ശനിയുടെയും അതിന്റെ ഉപഗ്രഹങ്ങളുടെയും പിന്നാലെയായിരുന്നു. ശനിയില്‍ വീശിയടിക്കുന്ന ശക്തമായ കൊടുങ്കാറ്റും എന്‍സിലാഡസ് എന്ന ഉപഗ്രഹത്തില്‍ നിന്ന് ശനിയിലേക്ക് പ്രവഹിക്കുന്ന ജലധാരയും ടൈറ്റനിലെ മീഥേയ്ന്‍ സമുദ്രങ്ങളും സ്വാഭാവിക പ്ലാസ്റ്റിക്കിന്റെ സാന്നിധ്യവും കസീനി ശാസ്ത്രലോകത്തിന് പരിചയപ്പെടുത്തിക്കൊടുത്തു. ശനിയുടെ ഘടനയേക്കുറിച്ചും അതിന്റെ ഉപഗ്രഹങ്ങളേക്കുറിച്ചും ശാസ്ത്രലോകത്തിന് വ്യക്തമായ ധാരണയുണ്ടായത് കസീനി ദൗത്യം വഴിയാണ്. 2005 ല്‍ കസീനി ദൗത്യത്തിലെ ഇരട്ട പേടകങ്ങളിലൊന്നായ ഹൈഗന്‍സ് ഔട്ടര്‍ സോളാര്‍ സിസ്റ്റത്തില്‍ ഇറങ്ങുന്ന ആദ്യ വാഹനമായി. പതിനാറ് യൂറോപ്യന്‍ രാജ്യങ്ങള്‍ കസീനിയുടെ ഡിസൈനിംഗില്‍ സഹകരിച്ചിട്ടുണ്ട്. ടൈറ്റന്‍ ഉപഗ്രഹം കണ്ടെത്തിയ ഡച്ച് ജ്യോതിശാസ്ത്രജ്ഞനായ ക്രിസ്റ്റ്യന്‍ ഹൈഗന്‍സിന്റെയും ശനിയുടെ നിരവധി ഉപഗ്രഹങ്ങള്‍ കണ്ടെത്തിയ ഇറ്റാലിയന്‍ വാനനിരീക്ഷകനായ ഡൊമനിക്കോ കസീനിയുടെയും സ്മരണയിലാണ് ഈ ദൗത്യത്തിന് കസീനി-ഹൈഗന്‍സ് ദൗത്യം എന്ന് നാമകരണം ചെയ്തത്. ദൗത്യത്തിന്റെ ചെലവിന്റെ 80 ശതമാനവും വഹിക്കുന്നത് നാസയാണ്. ബാക്കിഭാഗം യൂറോപ്യന്‍ സ്‌പേസ് ഏജന്‍സിയും ഇറ്റാലിയന്‍ സ്‌പേസ് ഏജന്‍സിയും ചേര്‍ന്ന് നിര്‍വഹിക്കുന്നു.
ഇത്രയധികം സങ്കീര്‍ണമായ യന്ത്ര സംവിധാനങ്ങളുള്ള ഒരു സ്‌പേസ്‌ക്രാഫറ്റ് ബഹിരാകാശ പര്യവേഷണ ചരിത്രത്തിലുണ്ടായിട്ടില്ല. 6.8 മീറ്റര്‍ ഉയരവും 4 മീറ്റര്‍ വീതിയുമുള്ള കസീനിയ്ക്ക് 5712 കിലോഗ്രാം ഭാരമുണ്ട്. പരസ്പരം ബന്ധിപ്പിച്ചിട്ടുള്ള 1630 ഇലക്‌ട്രോണിക് ഉപകരണങ്ങള്‍ കസീനിയിലുണ്ട്. കേബിള്‍ കണക്ഷന്റെ നീളം 14 കിലോമീറ്റര്‍ വരും. ഔട്ടര്‍ സോളാര്‍ സിസ്റ്റത്തില്‍ പര്യവേഷണം നടത്തുന്നതുകൊണ്ട് പേടകത്തിന്റെ ഊര്‍ജാവശ്യങ്ങള്‍ പരിഹരിക്കുന്നതിന് സോളാര്‍ പാനലുകള്‍ അപര്യാപ്തമാണ്. അതുകൊണ്ട് സോളാര്‍ പാനലുകള്‍ക്കു പകരം മൂന്ന് റേഡിയോ ഐസോടോപ് ജനറേറ്ററുകളാണ് കസീനിയില്‍ ഉപയോഗിക്കുന്നത്. ഈ ജനറേറ്ററുകളില്‍ ഉപയോഗിക്കുന്ന റേഡിയോ ആക്ടീവ് ഐസോടോപ് ആയ പ്ലൂട്ടോണിയം-238 തെര്‍മോ കപ്ലിംഗ് പ്രവര്‍ത്തനത്തിലൂടെ പേടകത്തിനാവശ്യമായ വൈദ്യുതി ലഭ്യമാക്കും.

Facebook Comments

About admin

Leave a Reply

Your email address will not be published. Required fields are marked *

*