anyagraha-jeevi

അന്യഗ്രഹജീവികളെ നേരില്‍ കാണാന്‍ ഈ തലമുറയ്ക്കാകുമോ?

സാബു ജോസ്
sabuഭൂമിക്കു വെളിയില്‍ ജീവനുണ്ടോ? മറ്റേതെങ്കിലുമൊരു ലോകത്തിരുന്ന് ആരെങ്കിലും നമ്മെ നിരീക്ഷിക്കുന്നുണ്ടോ? ഉണ്ടെന്നാണ് ശാസ്ത്രലോകം പറയുന്നത്. ഉണ്ടെന്നു മാത്രമല്ല, അത്തരം ഭൗമേതര ജീവികളെ ഇരുപതു വര്‍ഷത്തിനുള്ളില്‍ നേരിട്ടു കാണാന്‍ കഴിയുമെന്നാണ് നാസയിലെ ശാസ്ത്രജ്ഞര്‍ അവകാശപ്പെടുന്നത്. 2017, 2018 വര്‍ഷങ്ങളില്‍ വിക്ഷേപിക്കപ്പെടുന്ന ടെസ് , ജെയിംസ് വെബ് സ്‌പേസ് ടെലസ്‌ക്കോപ്പ് എന്നീ ബഹിരാകാശ ദൂരദര്‍ശിനികള്‍ ഭൗമേതര ജീവന്‍ യാഥാര്‍ഥ്യമാണെന്നു തെളിയിക്കുമെന്നാണ് ശാസ്ത്രജ്ഞര്‍ പറയുന്നത്. അതുകൂടാതെ, 2014 ജൂലൈ മാസത്തില്‍ ചിലിയിലെ അറ്റക്കാമ മരുഭൂമിയില്‍ നിര്‍മാണമാരംഭിച്ച, ലോകത്തിലെ ഏറ്റവും വലിയ ഒപ്ടിക്കല്‍ ടെലസ്‌കോപ്പായ ഇ-എല്‍റ്റിന്റെ നിര്‍മാണം 2022ല്‍ പൂര്‍ത്തിയാകും. 39.3 മീറ്റര്‍ വ്യാസമുള്ള ഇ-എല്‍റ്റിന്റെ മുഖ്യദര്‍പ്പണം അന്യഗ്രഹ ജീവന്‍ നേരിട്ടു നിരീക്ഷിക്കാന്‍ ശേഷിയുള്ളതാണ്. അതായത് ഈ തലമുറയ്ക്കു തന്നെ ഭൗമേതര ജീവന്‍ നേരിട്ടു കാണാന്‍ കഴിയുമെന്നര്‍ഥം.

കഥയും കാല്‍പനികതയും മിത്തും യാഥാര്‍ഥ്യവുമെല്ലാം ചേര്‍ന്ന് കെട്ടുപിണഞ്ഞുകിടക്കുന്ന ഒരു സങ്കീര്‍ണ ചിത്രമാണ് ഭൗമേതര ജീവന്‍ നമുക്കു മുന്നില്‍ സൃഷ്ടിക്കുന്നത്. മനുഷ്യന്‍ സ്വപ്‌നം കാണാന്‍ തുടങ്ങിയതു മുതല്‍ ഭൗമേതര ജീവനും പിറവിയെടുത്തു. ഭാവനകള്‍ നിറംപിടിപ്പിച്ച അന്യഗ്രഹ നാഗരികത ഇന്ന് സാങ്കേതികവിദ്യയുടെ ചിറകിലേറി യാഥാര്‍ഥ്യത്തോടടുക്കുകയാണ്. ആ ചരിത്രമുഹൂര്‍ത്തത്തിന് സാക്ഷ്യംവഹിക്കാനുള്ള ഭാഗ്യം ഈ തലമുറയ്ക്കു ലഭിക്കുമെന്നാണ് ശാസ്ത്രലോകം പ്രതീക്ഷിക്കുന്നത്.

എച്ച്.ജി. വെല്‍സിന്റെ ‘വാര്‍ ഓഫ് ദ് വേള്‍ഡ്‌സ്’ എന്ന നോവലില്‍ നിന്നെത്തുന്ന വിചിത്രജീവികള്‍ ഭൂമിയെ ആക്രമിക്കുന്നതു വിവരിച്ചിട്ടുണ്ട്. അവരുടെ കൈകളില്‍ യന്ത്രത്തോക്കുകള്‍ക്കു പകരം മാരകരശ്മികള്‍ ഉത്സര്‍ജിക്കുന്ന ഉപകരണങ്ങളാണുള്ളത്. ടാങ്കുകള്‍ക്കും യുദ്ധവിമാനങ്ങള്‍ക്കും പകരം കില്ലര്‍ റോബോട്ടുകളും പറക്കുംതളികകളുമാണ് അവര്‍ ഉപയോഗിക്കുന്നത്. വളരെ പെട്ടെന്നു തന്നെ ഭൂമിയിലെ മഹാനഗരങ്ങളെല്ലാം അവര്‍ ആക്രമിച്ചു കീഴടക്കി. അവരുടെ മുന്നേറ്റം തടയുന്നതിന് മനുഷ്യന്‍ കണ്ടുപിടിച്ച ഒരായുധങ്ങള്‍ക്കും യന്ത്രങ്ങള്‍ക്കും കഴിഞ്ഞില്ല. ഒടുവില്‍ അവര്‍ തോറ്റോടിയത് ഭൂമിയിലെ സൂക്ഷ്മജീവികളുടെ മുന്നിലാണ്. ഇവിടുത്തെ, ബാക്ടീരിയകളെയും വൈറസുകളെയും നേരിടാന്‍ അവര്‍ക്കത്ര പരിചയം പോര.

വെല്‍സിന്റെ നോവലിനെത്തുടര്‍ന്ന് നൂറുകണക്കിന് നോവലുകളും സിനിമകളുമാണ് അന്യഗ്രഹ ജീവികളുടെ ആക്രമണവുമായി ബന്ധപ്പെട്ട് ഇരുപതാം നൂറ്റാണ്ടിന്റെ അവസാന ദശകങ്ങളില്‍ പുറത്തിറങ്ങിയത്. പറക്കുംതളികകളുടെ ഭൗമസന്ദര്‍ശനവും ലോകാവസാനവുമെല്ലാം അന്യഗ്രഹജീവികളുടെ ആക്രമണവുമായി ബന്ധപ്പെടുത്തി അവതരിപ്പിക്കപ്പെട്ടു. ഇത്തരം അന്യഗ്രഹജീവികള്‍ക്ക് അഥവാ ഏലിയനുകള്‍ക്ക് നോവലിസ്റ്റിന്റെയും തിരക്കഥാകൃത്തിന്റെയും ഭാവനയ്ക്കനുസരിച്ച് നിരവധി രൂപങ്ങളും കൈവന്നു. പൊതുവെ ഏലിയനുകള്‍ വലിയ തലയും പച്ച ശരീരവുമുള്ള ജീവികളായാണ് അവതരിപ്പിക്കപ്പെട്ടത്. ഏറെക്കുറെ മനുഷ്യരൂപം തന്നെയാണ് അവയ്ക്കുമുണ്ടായിരുന്നത്. സ്‌നേഹം, ദയ, കാമം, ദേഷ്യം തുടങ്ങിയ പല മാനുഷിക വികാരങ്ങളും അവര്‍ക്ക് ചാര്‍ത്തിക്കൊടുക്കുന്നതിലും എഴുത്തുകാര്‍ മടികാണിച്ചില്ല. അതിനും പുറമെ ഈ അന്യഗ്രഹജീവികള്‍ സംസാരിക്കുന്നത് ശുദ്ധ ആംഗലേയ ഭാഷയിലാണുതാനും!

കാര്‍ബണ്‍ ആധാരമായുള്ള മസ്തിഷ്‌കവും , അതുപയോഗിച്ചു നിര്‍മിച്ച സിലിക്കണ്‍ മസ്തിഷ്‌കവും നമുക്ക് കുറേയെങ്കിലും പരിചിതമാണ്. എന്നാല്‍ ഒരു ഏലിയന്‍ മസ്തിഷ്‌കം, അതെങ്ങനെയായിരിക്കുമെന്ന് പ്രവചിക്കാന്‍ കഴിയില്ല. മനുഷ്യമസ്തിഷ്‌കത്തിന്റെ ചിന്താപദ്ധതികള്‍ തന്നെയാണോ അത്തരം ജീവികളെയും നയിക്കുന്നതെന്നു പറയാനും കഴിയില്ല. മാത്രവുമല്ല, അത്തരം താരതമ്യങ്ങള്‍ക്ക് ശാസ്ത്രീയമായ ഒരടിത്തറയുമില്ല. 2011ല്‍ സ്റ്റീഫന്‍ ഹോക്കിംഗ് ഉന്നയിച്ച ഒരു പ്രശ്‌നം ഇവിടെ ശ്രദ്ധേയമാണ്. ഭാവിയില്‍ ആണവായുധ ഭീഷണിപോലെയോ അതിനേക്കാള്‍ കരുതല്‍ വേണ്ടതോ ആണ് അന്യഗ്രഹജീവികളില്‍ നിന്നുള്ള ആക്രമണമെന്നാണ് ഹോക്കിംഗ് പറയുന്നത്. ഏതുനിമിഷവും അത്തരമൊരു ആക്രമണം ഭൂമി പ്രതീക്ഷിക്കണമെന്നും അദ്ദേഹം പറയുന്നു.

anyagraha-jeevi-2

ഭൗമേതര ജീവന്‍ ജ്യോതിശാസ്ത്രത്തില്‍
2011ലാണ് കെപ്ലര്‍ സ്‌പേസ്‌ക്രാഫ്റ്റ് ചരിത്രത്തിലാദ്യമായി സൗരയൂഥത്തിനു വെളിയിലുള്ള ഗ്രഹങ്ങളുടെ ഒരു സെന്‍സസ് എടുക്കുന്നത്. സ്‌പേസ്‌ക്രാഫ്റ്റിന്റെ നിരീക്ഷണപരിധിയിലുള്ള സിഗ്നസ്, ലൈറ, ഡ്രാക്കോ നക്ഷത്രരാശികളില്‍പ്പെട്ട 1,45,000 നക്ഷത്രങ്ങള്‍ക്കു ചുറ്റുമുള്ള ഗ്രഹങ്ങളുടെ സ്ഥിതിവിവരക്കണക്ക് തയ്യാറാക്കിയപ്പോള്‍ നൂറുഗ്രഹങ്ങളില്‍ ഒന്നുവീതം ഭൗമസമാനമാണെന്നു കണ്ടെത്തുകയുണ്ടായി. ഈ അനുപാതം ക്ഷീരപഥത്തിലേക്കു പ്രക്ഷേപിച്ചാല്‍ ഗാലക്‌സിയില്‍ ആകെയുള്ള ഭൗമസമാന ഗ്രഹങ്ങളുടെ എണ്ണം 300 കോടിയിലും അധികമായിരിക്കും. ഇനി പ്രപഞ്ചത്തിലാകെയുള്ള ഭൗമസമാന ഗ്രഹങ്ങളുടെ എണ്ണം കണക്കാക്കിയാലോ? ഹബിള്‍ സ്‌പേസ് ടെലസ്‌കോപ്പ് നിര്‍മിച്ച പ്രപഞ്ചചിത്രത്തിന്റെ അടിസ്ഥാനത്തില്‍ ഈ പ്രപഞ്ചത്തില്‍ പതിനായിരം കോടിയില്‍പരം ഗാലക്‌സികളുണ്ട്. അങ്ങനെ വരുമ്പോള്‍ പ്രപഞ്ചത്തിലാകെയുള്ള ഭൗമസമാന ഗ്രഹങ്ങള്‍ എണ്ണിയാലൊടുങ്ങാത്തത്രയുമുണ്ട്.

ഭൂതല ദൂരദര്‍ശിനികളുടെ സഹായത്തോടെ ഇതുവരെ ആയിരത്തിലധികം എക്‌സോപ്ലാനറ്റുകള്‍ കണ്ടെത്തിയിട്ടുണ്ട്. ആഴ്ചയിലൊന്ന് എന്ന ക്രമത്തില്‍ പുതിയ ഓരോ ഗ്രഹങ്ങളെ വീതം ജ്യോതിശാസ്ത്രജ്ഞര്‍ കണ്ടെത്തുന്നുമുണ്ട്. നിര്‍ഭാഗ്യവശാല്‍ ഇങ്ങനെ കണ്ടെത്തുന്ന ഗ്രഹങ്ങളിലധികവും വ്യാഴത്തെപ്പോലെയോ, യുറാനസിനേപ്പോലെയോ ഉള്ള വലിയ വാതക ഗോളങ്ങളാണ്. ഖരോപരിതലമില്ലാത്ത ഇത്തരം ഗ്രഹങ്ങളില്‍ ജീവന്‍ തിരയുന്നതില്‍ വലിയ കാര്യമൊന്നുമില്ല. എന്നാല്‍, ഏതാനും ചില ‘സൂപ്പര്‍ എര്‍ത്തു’കളെയും കണ്ടെത്താന്‍ കഴിഞ്ഞിട്ടുണ്ട്. ഖരോപരിതലവും ഭൂമിയുടെ ഇരട്ടിയോളം വലിപ്പവും മാതൃനക്ഷത്രത്തോട് താരതമ്യേന അടുത്തും കാണപ്പെടുന്നവയാണ് സൂപ്പര്‍ എര്‍ത്തുകള്‍. ജലം ദ്രാവകാവസ്ഥയില്‍ നിലനില്‍ക്കുന്നതിന് സാധ്യതയുള്ള അകലമാണ് ഇവയ്ക്ക് മാതൃനക്ഷത്രവുമായുള്ളത്. വാസയോഗ്യമേഖല എന്നാണീ അകലം അറിയപ്പെടുന്നത്. ജലവും ജീവനുമായി അഭേദ്യമായ ബന്ധമാണുള്ളത്. ജലത്തെ ‘യൂണിവേഴ്‌സല്‍ സോള്‍വെന്റ്’ എന്നാണു വിളിക്കുന്നത്. ഡി.എന്‍.എയും പ്രോട്ടീനുകളുമുള്‍പ്പെടെ മിക്കവാറും എല്ലാ ഓര്‍ഗാനിക് സംയുക്തങ്ങളും ജലത്തില്‍ ലയിച്ചുചേരും.

2013ലാണ് അന്യഗ്രഹവേട്ടയുടെ ചരിത്രത്തിലെ സുവര്‍ണ നിമിഷം പിറക്കുന്നത്. കെപ്ലര്‍ സ്‌പേസ്‌ക്രാഫ്റ്റ് ഭൂമിയില്‍നിന്നും 1200 പ്രകാശവര്‍ഷം അകലെ കണ്ടെത്തിയ രണ്ട് എക്‌സോപ്ലാനറ്റുകള്‍ ഏറെക്കുറെ ഭൂമിയുടെ തനിപ്പകര്‍പ്പു തന്നെയാണ്. അവയിലൊന്ന് ഭൂമിയേക്കാള്‍ 60 ശതമാനവും മറ്റൊന്ന് 40 ശതമാനവും മാത്രം വലിപ്പം കൂടിയവയാണ്. അതിലുപരി ഈ രണ്ടു ഗ്രഹങ്ങളും അവയുടെ മാതൃനക്ഷത്രത്തിന്റെ വാസയോഗ്യമേഖലയിലാണു സ്ഥിതിചെയ്യുന്നതും. ഈ ഗ്രഹങ്ങളില്‍ ദ്രാവകസമുദ്രങ്ങളുണ്ടാകാനുള്ള സാധ്യത വളരെയധികമാണ്. ഇതുവരെ കണ്ടെത്തിയ എണ്ണൂറില്‍പരം ഭൗമസമാന ഗ്രഹങ്ങളെ പരിഗണിച്ചാല്‍ ഭൂമിയുമായി ഏറ്റവും സാദൃശ്യമുള്ളത് ഈ ഗ്രഹങ്ങള്‍ക്കാണ്.

സെറ്റിയും അന്യഗ്രഹജീവികളും
റേഡിയോ ദൂരദര്‍ശിനികളുടെ ആവിര്‍ഭാവത്തോടെയാണ് അന്യഗ്രഹ ജീവന്‍ തേടിയുള്ള അന്വേഷണങ്ങള്‍ക്ക് ഒരു ദിശാബോധം കൈവന്നത്. ഉയര്‍ന്ന തരംഗദൈര്‍ഘ്യമുള്ള റേഡിയോ തരംഗങ്ങള്‍ക്ക് സ്‌പേസിലെ തടസ്സങ്ങളെ മറികടന്ന് ദീര്‍ഘദൂരം സഞ്ചരിക്കുന്നതിന് സാധിക്കുന്നതുകൊണ്ട് ഭൗമേതര നാഗരികത തിരയുന്നവര്‍ക്ക് ഈ തരംഗങ്ങള്‍ ഒഴിച്ചുകൂടാനാവാത്ത ഉപാധിയായി മാറി. 1960കളിലാണ് റേഡിയോ തരംഗങ്ങള്‍ അന്യഗ്രഹ ജീവന്‍ തിരയുന്നതിന് ഉപയോഗിക്കാനാരംഭിച്ചത്. ജ്യോതിശാസ്ത്രജ്ഞനായ ഫ്രാങ്ക് ഡ്രേക്ക് ആരംഭിച്ച പ്രൊജക്ട് ഓസ്മയാണ് ഈ മേഖലയിലുണ്ടായ ആദ്യ നീക്കം. വെസ്റ്റ് വിര്‍ജിനിയയിലുള്ള ഗ്രീന്‍ബാങ്ക് റേഡിയോ ടെലസ്‌കോപ്പ് ഉപയോഗിച്ചാണ് പ്രൊജക്ട് ഓസ്മയുടെ പ്രവര്‍ത്തനങ്ങള്‍ നടത്തിയത്. ഭൗമേതര ജീവന്‍ തേടിയുള്ള ഈ അന്വേഷണങ്ങള്‍ പിന്നീട് സെറ്റി എന്നറിയപ്പെടാന്‍ തുടങ്ങി. നിര്‍ഭാഗ്യവശാല്‍ സെറ്റി സംഘത്തിന് മറ്റേതെങ്കിലുമൊരു ലോകത്തില്‍ നിന്നുള്ള ഒരു സന്ദേശവും ഇന്നുവരെ ലഭിച്ചിട്ടില്ല. പിന്നീട് 1971ല്‍ നാസയുടെ നേതൃത്വത്തില്‍ പ്രൊജക്ട് സൈക്ലോപ്‌സ് എന്നൊരു പദ്ധതിയെക്കുറിച്ചുള്ള ചര്‍ച്ചകള്‍ തുടങ്ങിയിരുന്നു. 1500 ദൂരദര്‍ശിനികള്‍ ഒരുമിച്ചു ചേര്‍ത്തുകൊണ്ടുള്ള ഒരു ബൃഹത്തായ അന്യഗ്രഹവേട്ടയായിരുന്നു ഇത്. എന്നാല്‍, അമേരിക്കന്‍ കോണ്‍ഗ്രസ്സിന് ഈ പദ്ധതിയില്‍ താത്പര്യമില്ലാത്തതുകൊണ്ടും ധനസമാഹരണത്തിനു മറ്റു മാര്‍ഗങ്ങളില്ലാത്തതുകൊണ്ടും ഈ പദ്ധതി ഉപേക്ഷിക്കുകയാണുണ്ടായത്. 1971ല്‍ തന്നെ മറ്റൊരു മുന്നേറ്റവും ഈ രംഗത്തുണ്ടായി. പ്യുവര്‍ട്ടോറിക്കയിലെ അറേസിബോ റേഡിയോ ടെലസ്‌കോപ്പ് ഉപയോഗിച്ച് 1679 ബിറ്റുകളുള്ള ഒരു റേഡിയോ സന്ദേശം 25,100 പ്രകാശവര്‍ഷം അകലെയുള്ള എം-13 ഗ്ലോബുലര്‍ ക്ലസ്റ്ററിലേക്ക് ശാസ്ത്രജ്ഞര്‍ അയച്ചു. ഒരുപക്ഷെ ലോകത്തിലെ ആദ്യത്തെ കോസ്മിക് ഗ്രീറ്റിംഗ് കാര്‍ഡ് ഇതായിരിക്കും. ഭൗമ ജീവനേക്കുറിച്ചുള്ള ഒരു ലഘുവിവരണമായിരുന്നു ഈ സന്ദേശത്തിലുണ്ടായിരുന്നത്. എന്നാല്‍ ഇതുവരെ മറുപടി സന്ദേശങ്ങളൊന്നും അവര്‍ക്ക് ലഭിച്ചിട്ടില്ല. അന്യഗ്രഹ ജീവികള്‍ക്ക് നമ്മെ ഇഷ്ടപ്പെടാത്തതുകൊണ്ടാണോ എന്തോ? എന്നാല്‍ മറുപടി സന്ദേശം ലഭിക്കാത്തതില്‍ ശാസ്ത്രജ്ഞര്‍ക്ക് നിരാശയൊന്നുമില്ല. എം-13 ഗ്ലോബുലര്‍ ക്ലസ്റ്ററിലുള്ള ഒരു അന്യഗ്രഹ നാഗരികതയില്‍ നിന്നുള്ള മറുപടി സന്ദേശം ഭൂമിയിലെത്തുന്നതിന് ഇനി 52,174 വര്‍ഷങ്ങള്‍കൂടി വേണം. റേഡിയോ തരംഗങ്ങള്‍ക്ക് പ്രകാശവേഗതയ്ക്കപ്പുറം സഞ്ചരിക്കാന്‍ കഴിയില്ലല്ലോ.

ആദ്യ കോസ്മിക് ഗ്രീറ്റിംഗ് കാര്‍ഡിനു ശേഷവും തുടര്‍ന്നും സ്‌പേസിലേക്ക് മുറതെറ്റാതെ റേഡിയോ സന്ദേശങ്ങള്‍ അയച്ചുകൊണ്ടിരുന്നു. മെറ്റി പ്രൊജക്ട് എന്നാണീ സംരംഭം അറിയപ്പെടുന്നത്. എന്നാല്‍ ഇത്തരം റേഡിയോ സന്ദേശങ്ങള്‍ കൊണ്ട് വലിയ പ്രയോജനമൊന്നുമുണ്ടാകില്ലെന്ന് കരുതുന്ന ശാസ്ത്രജ്ഞരുമുണ്ട്. റേഡിയോ, ടി.വി. സിഗ്നലുകളുടെ ഒരു മഹാപ്രളയം തന്നെ നിത്യേന ഉണ്ടായിക്കൊണ്ടിരിക്കുമ്പോള്‍ മെറ്റി സിഗ്നലുകളെ ഇതില്‍നിന്നു വേര്‍പെടുത്തി കാണാന്‍ കഴിയില്ലെന്നാണ് വിമര്‍ശകരുടെ വാദം. അതെന്തായാലും മെറ്റി സന്ദേശങ്ങള്‍ മുറതെറ്റാതെ അയച്ചുകൊണ്ടിരിക്കുന്നുമുണ്ട്.

seti4

1999ല്‍ ബെര്‍ക്കെലെയിലെ യൂണിവേഴ്‌സിറ്റി ഓഫ് കാലിഫോര്‍ണിയയിലെ ജ്യോതിശാസ്ത്രജ്ഞര്‍ രൂപംകൊടുത്ത മറ്റൊരു പ്രൊജക്ട് ശ്രദ്ധേയമാണ്. സെറ്റി@ഹോം എന്ന പേരിലറിയപ്പെടുന്ന ഈ സംവിധാനത്തില്‍ സ്വന്തമായി കംപ്യൂട്ടര്‍ ഉള്ള ആര്‍ക്കും പങ്കാളിയാകാം. പ്യുവര്‍ട്ടോറിക്കയിലെ അറേസിബോ റേഡിയോ ടെലസ്‌കോപ്പുമായി ബന്ധിപ്പിച്ചാണ് ഈ സംവിധാനം പ്രവര്‍ത്തിക്കുന്നത്. ഈ പ്രൊജക്ടില്‍ രജിസ്റ്റര്‍ ചെയ്തിട്ടുള്ള കംപ്യൂട്ടറുകളില്‍ ലഭിക്കുന്ന അപരിചിത റേഡിയോ സിഗ്നലുകള്‍ സെറ്റി@ഹോ സോഫ്റ്റ്‌വെയര്‍ ഉപയോഗിച്ച് പരിശോധിക്കാന്‍ കഴിയും. അതുവഴി അന്യഗ്രഹ ജീവന്‍ തേടിയുള്ള അന്വേഷണത്തില്‍ ശാസ്ത്രജ്ഞര്‍ക്കൊപ്പം പൊതുജനങ്ങള്‍ക്കും പങ്കാളികളാകാന്‍ കഴിയും. നിലവില്‍ 234 രാജ്യങ്ങളിലെ 52 ലക്ഷം ആളുകള്‍ ഈ പ്രൊജക്ടിന്റെ ഭാഗമായി ഭൗമേതര ജീവന്റെ അടയാളങ്ങള്‍ തിരഞ്ഞുകൊണ്ടിരിക്കുകയാണ്.

സെറ്റിയും യൂഫോയും
പൊതുവെ തെറ്റിദ്ധാരണ ജനിപ്പിക്കുന്ന രണ്ടു വാക്കുകളാണ് സെറ്റിയും യൂഫോയും. സെറ്റി പ്രൊജക്ട് നൂറുശതമാനവും ശാസ്ത്രീയമായ പരീക്ഷണ-നിരീക്ഷണ പദ്ധതിയാണ്. ഭൗതികശാസ്ത്രത്തിലെയും ജ്യോതിശാസ്ത്രത്തിലെയും പ്രമാണങ്ങള്‍ അനുസരിച്ച് ഏറ്റവും നവീനമായ സാങ്കേതികവിദ്യയുടെ സഹായത്തോടെയാണ് സെറ്റി പ്രൊജക്ടില്‍ ഭൗമേതര ജീവന്‍ തിരയുന്നത്. എന്നാല്‍ യൂഫോ അങ്ങനെയല്ല. യൂഫോ വേട്ടക്കാര്‍ പറക്കുംതളികകള്‍ പോലെയുള്ള പ്രതിഭാസങ്ങള്‍ ആകാശത്തും ഭൂമിയിലും കണ്ടെത്തിയെന്നു പറയുകയും അവയുടെ ചിത്രങ്ങളും ഗ്രാഫിക്‌സുമെല്ലാം പ്രദര്‍ശിപ്പിച്ച് ജനങ്ങളില്‍ കൗതുകവും ആശങ്കയും ജനിപ്പിക്കുന്ന ആളുകളുടെ ഒരു സംഘമാണ്. കണ്ണൂര്‍ ബീച്ചില്‍ ‘കണ്ട’ പറക്കുംതളികയുടെ ചിത്രവും വാര്‍ത്തയും മലയാളത്തിലെ ഒരു പ്രമുഖ വര്‍ത്തമാനപത്രത്തില്‍ പ്രസിദ്ധീകരിച്ചത് ഒരുതരം യൂഫോ വേട്ടയാണ്. യാതൊരു ശാസ്ത്രീയ അടിത്തറയും ഈ സംരംഭത്തിനില്ല. പലപ്പോഴും വര്‍ത്തമാനകാല യാഥാര്‍ഥ്യങ്ങളില്‍നിന്ന് ജനശ്രദ്ധ തിരിച്ചുവിടുന്നതിനാണ് ഇത്തരം യൂഫോ വാര്‍ത്തകള്‍ പുറത്തുവിടുന്നത്. കണ്ണൂരില്‍ കണ്ട പറക്കുംതളിക ആന്‍ഡ്രോയിഡ് സ്മാര്‍ട്ട് ഫോണുപയോഗിച്ച് നിര്‍മിച്ചതാണെന്നു തൊട്ടടുത്ത ദിവസം തന്നെ തിരിച്ചറിഞ്ഞു. എന്നാല്‍ ഒരു പത്തുവര്‍ഷം മുമ്പുവരെ ഇത്തരമൊരു ചിത്രവും വാര്‍ത്തയും ഏതെങ്കിലുമൊരു പത്രത്തില്‍ പ്രത്യക്ഷപ്പെട്ടാല്‍ പൊതുജനങ്ങള്‍ക്ക് വിശ്വസിക്കാതിരിക്കാന്‍ കഴിയില്ലായിരുന്നു. ചൊവ്വയില്‍ ‘കണ്ടെത്തിയ’ സ്ത്രീരൂപവും യൂഫോ വേട്ടക്കാരുടെ വിദ്യയായിരുന്നു. മാധ്യമങ്ങളില്‍ തെളിവില്ലാത്ത ഇത്തരം വാര്‍ത്തകള്‍ പ്രസിദ്ധീകരിക്കുന്നതു കാരണം ശാസ്ത്രീയമായ അന്യഗ്രഹവേട്ടയും യൂഫോ വാര്‍ത്തകളും തമ്മില്‍ തിരിച്ചറിയാന്‍ കഴിയാതെ വരുന്നുണ്ട്. അന്യഗ്രഹജീവികള്‍ ഭൂമിയിലെത്തിയതിനെക്കുറിച്ചോ, പറക്കുംതളികകളെക്കുറിച്ചോ ഇന്നുവരെ യാതൊരു തെളിവും ലഭിച്ചിട്ടില്ല.

ഡ്രേക്കിന്റെ സമവാക്യങ്ങള്‍
ഭൗമേതര ജീവനേക്കുറിച്ച് അന്വേഷിക്കുന്നതിനു മുമ്പുതന്നെ ഭൂമിക്കു വെളിയില്‍, സൗരയൂഥത്തിനുമപ്പുറം ക്ഷീരപഥത്തില്‍ ജീവന്‍ ഉദ്ഭവിക്കുന്നതിനും നിലനില്‍ക്കുന്നതിനും അനുകൂല സാഹചര്യങ്ങളുള്ള ഇടങ്ങള്‍ ഉണ്ടോ എന്ന അന്വേഷണം ശാസ്ത്രജ്ഞര്‍ ആരംഭിച്ചിരുന്നു. ഇതില്‍ പ്രധാനപ്പെട്ട ഒരു നീക്കമായിരുന്നു 1961ല്‍ അവതരിപ്പിച്ച ഡ്രേക്കിന്റെ സമവാക്യങ്ങള്‍ . ഫ്രാങ്ക് ഡ്രേക്കിന്റെ കണക്കുകൂട്ടല്‍ അനുസരിച്ച് ക്ഷീരപഥത്തില്‍ പതിനായിരം കോടി നക്ഷത്രങ്ങളുണ്ട് (മുപ്പതിനായിരം കോടിയെന്നത് പുതിയ കണക്ക്). ഈ നക്ഷത്രങ്ങളുടെ പത്തുശതമാനം സൂര്യസമാന നക്ഷത്രങ്ങളാണ് . ഇവയില്‍ ഗ്രഹകുടുംബം രൂപപ്പെട്ടവ പത്തുശതമാനമാണെന്നു പരിഗണിക്കാം. ഖരോപരിതലമുള്ള ഗ്രഹങ്ങള്‍ രൂപപ്പെട്ട നക്ഷത്രങ്ങള്‍ ഇവയുടെ പത്തുശതമാനമുണ്ടെന്നും പരിഗണിക്കാം. ഇത്തരം ഗ്രഹങ്ങള്‍ മാതൃനക്ഷത്രത്തിന്റെ വാസയോഗ്യമേഖലയില്‍ കാണപ്പെടുന്ന നക്ഷത്രങ്ങളെ വീണ്ടും പത്തു ശതമാനത്തിലേക്ക് ചുരുക്കാം. ഈ സ്ഥിതിവിവരക്കണക്ക് ഇങ്ങനെ ആറ്റിക്കുറുക്കിയാല്‍ ക്ഷീരപഥത്തില്‍ വികാസം പ്രാപിച്ച പതിനായിരം നാഗരികതയെങ്കിലുമുണ്ടാകുമെന്നാണ് ഡ്രേക്ക് കണക്കുകൂട്ടിയത്. പിന്നീട് കാള്‍ സാഗന്‍ ഇതില്‍നിന്നും വ്യത്യസ്തമായ രീതിയില്‍ നടത്തിയ കണക്കുകൂട്ടലില്‍ ക്ഷീരപഥത്തില്‍ പത്തുലക്ഷത്തില്‍പരം വികാസം പ്രാപിച്ച നാഗരികതകളുണ്ടെന്ന് കണ്ടെത്തി. ഇന്ന് സാങ്കേതികവിദ്യയുടെ വളര്‍ച്ച കൂടുതല്‍ വിശ്വസനീയമായ സ്ഥിതിവിവരക്കണക്കുകള്‍ തയ്യാറാക്കാന്‍ ശാസ്ത്രജ്ഞരെ സഹായിക്കുന്നുണ്ട്. ക്ഷീരപഥത്തിലെ വാസയോഗ്യ ഗ്രഹങ്ങളുടെ എണ്ണം ഡ്രേക്കും സാഗനും കണക്കുകൂട്ടിയതിലും വളരെയധികമാണെന്ന് ഇന്ന് നമുക്കറിയാം. എന്നാല്‍, അവയില്‍ എത്രയെണ്ണത്തില്‍ ജീവന്‍ ഉദ്ഭവിച്ചു, എത്രയെണ്ണത്തില്‍ ജീവന്‍ നിലനില്‍ക്കുന്നു എന്നു പറയാന്‍ ഇന്നു നമുക്കു കഴിയില്ലെന്നതും യാഥാര്‍ഥ്യമാണ്. ഭൗമജീവന് 350 കോടി വര്‍ഷത്തെ പാരമ്പര്യമുണ്ട്. ഭൗമജീവന്‍ പിറവിയെടുത്ത സമയത്തുതന്നെ ഇത്തരം ഗ്രഹങ്ങളില്‍ ജീവന്‍ ഉദ്ഭവിച്ചില്ലെങ്കില്‍ മാത്രമേ ഇത്തരമൊരു അന്വേഷണത്തിന് നാം പ്രതീക്ഷിക്കുന്ന പ്രതികരണമുണ്ടാവുകയുള്ളൂ.

താമസമെന്തേ വരുവാന്‍?
ക്ഷീരപഥത്തില്‍ മാത്രം കോടിക്കണക്കിന് വാസയോഗ്യഗ്രഹങ്ങളും അവയില്‍ വികാസം പ്രാപിച്ച നാഗരികതയുമുണ്ടെങ്കില്‍ അത്തരമൊരു ലോകത്തില്‍നിന്ന് ഇതുവരെ ആരെങ്കിലും ഭൂമിയിലേക്കൊന്ന് എത്തിനോക്കുകപോലും ചെയ്യാത്തത് എന്തുകൊണ്ടാണ്. ഈ പ്രശ്‌നം ആദ്യമായി ഉന്നയിച്ചത് ഫെര്‍മിയാണ്. അണുബോംബ് നിര്‍മിച്ച മാന്‍ഹാട്ടന്‍ പ്രൊജക്ടില്‍ അംഗമായിരുന്ന ഇറ്റാലിയന്‍ ഭൗതികശാസ്ത്രജ്ഞന്‍ എന്റികോ ഫെര്‍മി തന്നെ. ഫെര്‍മിയുടെ പ്രഹേളിക എന്നാണീ പ്രശ്‌നം അറിയപ്പെടുന്നത്.

എന്താണ് ഇന്നുവരെ ഒരു അന്യഗ്രഹജീവി ഭൂമിയിലെത്താതിരുന്നത് എന്നു ചോദിച്ചാല്‍ അതിനു നിരവധി സിദ്ധാന്തങ്ങള്‍ മറുപടി പറയും. ഇവയില്‍ പ്രധാനപ്പെട്ടത് ദൂരത്തെ സംബന്ധിച്ചുള്ള സിദ്ധാന്തമാണ്. നക്ഷത്രങ്ങള്‍ക്കിടയിലുള്ള ദൂരം തന്നെയാണ് വലിയ പ്രശ്‌നം. മനുഷ്യന്‍ നിര്‍മിച്ചിട്ടുള്ള ഏറ്റവും വേഗമേറിയ റോക്കറ്റില്‍ സഞ്ചരിച്ചാലും സൂര്യന്റെ തൊട്ടടുത്തുള്ള നക്ഷത്രത്തിലെത്താന്‍ 70,000 വര്‍ഷങ്ങള്‍ വേണ്ടിവരും. (സൂര്യന്റെ തൊട്ടടുത്ത നക്ഷത്രമായ പ്രോക്‌സിമ സെന്റോറിയിലേക്കുള്ള ദൂരം 4.3 പ്രകാശവര്‍ഷമാണ്). മനുഷ്യനേക്കാള്‍ ബുദ്ധിവികാസം പ്രാപിച്ച അന്യഗ്രഹജീവികളുണ്ടെങ്കില്‍ ഈ ദൂരപരിധി മറികടക്കാനുള്ള ഉപകരണങ്ങള്‍ അവര്‍ വികസിപ്പിച്ചിരിക്കും. അതൊരു സാധ്യത മാത്രമാണ്. അതോടൊപ്പം അതിബുദ്ധിമാന്‍മാരായ അത്തരം ജീവികള്‍ ആണവായുധങ്ങളേക്കാള്‍ മാരകമായ ആയുധങ്ങളും വികസിപ്പിച്ചിരിക്കും. അതുകൊണ്ടുതന്നെ അധികം ആയുസുമുണ്ടാകില്ല.
ഇനി ക്ഷീരപഥത്തിന്റെ വിശാലതയില്‍ നിരവധി വികസിച്ച നാഗരികതയുണ്ടെങ്കില്‍ തന്നെ അവയെല്ലാം ഭൂമിയെ തേടിവരേണ്ട കാര്യമെന്താണ്? മറ്റു വാസയോഗ്യ ഗ്രഹങ്ങളില്‍ നിന്ന് എന്തു മേന്മയാണ് ഭൂമിക്ക് അവകാശപ്പെടാനുള്ളത്? ഇത്തരം അന്യഗ്രഹ നാഗരികതകള്‍ അവയുടെ തൊട്ടടുത്തുള്ളവരുമായി ബന്ധം പുലര്‍ത്തുന്നുണ്ടോ എന്നും നമുക്കറിയില്ല. അന്യഗ്രഹജീവന്‍ ഉദ്ഭവിച്ചത് ഭൗമജീവന്‍ പിറന്ന സമയത്താണെങ്കില്‍ മാത്രമേ മനുഷ്യമസ്തിഷ്‌കത്തോടു തുല്യമായ ബുദ്ധിവളര്‍ച്ചയുള്ള ജീവിവര്‍ഗം ഉണ്ടാവുകയുള്ളൂ. അതിനു മുമ്പോ അതിനു ശേഷമോ ആണ് അവിടെ ജീവന്‍ ഉദ്ഭവിച്ചതെങ്കില്‍ ഒരു നക്ഷത്രാന്തര വാര്‍ത്താവിനിമയം സാധ്യമാകില്ല. ഭൗമജീവന്‍ കാര്‍ബണ്‍, നൈട്രജന്‍, ഹൈഡ്രജന്‍, ഓക്‌സിജന്‍, ഫോസ്ഫറസ്, സള്‍ഫര്‍ എന്നീ മൂലകങ്ങള്‍ ആധാരമായുള്ള ഒരു ജൈവവ്യവസ്ഥയാണ്. ഭൗമേതര ജീവന്‍ ഈ മൂലകങ്ങള്‍ ആധാരമായി നിര്‍മിക്കപ്പെട്ടതാണോ എന്ന് നമുക്കറിയില്ല. ഓരോ ഗ്രഹത്തിലെയും ജൈവഘടന മറ്റൊന്നില്‍നിന്ന് തികച്ചും വ്യത്യസ്തമായിരിക്കും. ഇനി അവയെല്ലാം തന്നെ ഒരേ ഘടനയുള്ളവയാണെങ്കില്‍ തന്നെ അവര്‍ സന്ദേശങ്ങള്‍ കൈമാറുന്നതിന് വിദ്യുത്കാന്തിക തരംഗങ്ങള്‍-വിശേഷിച്ചും റേഡിയോ തരംഗങ്ങള്‍ ആണോ ഉപയോഗിക്കുന്നതെന്നും നമുക്കറിയില്ല. മനുഷ്യമസ്തിഷ്‌കത്തേക്കാള്‍ വികാസം പ്രാപിച്ച മസ്തിഷ്‌കത്തിനുടമകളാണ് അവയെങ്കില്‍ നമ്മുടെ റേഡിയോ സന്ദേശങ്ങളോട് അവര്‍ പ്രതികരിക്കില്ല. അമീബ, സസ്തനികളുമായി സന്ദേശങ്ങള്‍ കൈമാറുന്നതിന് തുല്യമായിരിക്കുമത്. മനുഷ്യമസ്തിഷ്‌കത്തെ അപേക്ഷിച്ച് വികാസം കുറഞ്ഞ ബുദ്ധിശക്തിയാണ് അന്യഗ്രഹജീവികള്‍ക്കുള്ളതെങ്കില്‍ നമ്മുടെ റേഡിയോ സിഗ്നലുകള്‍ അവര്‍ക്ക് തിരിച്ചറിയാന്‍ കഴിയില്ല. ഇനിയും കോടിക്കണക്കിന് കിലോമീറ്ററുകളും പ്രകാശവര്‍ഷങ്ങളും താണ്ടി ഭൂമിയെന്ന കൊച്ചുഗ്രഹത്തിലെത്തേണ്ട ആവശ്യം അവര്‍ക്കെന്താണ്? മനുഷ്യന്റെ കാലഗണന തന്നെയാണോ അന്യഗ്രഹജീവികള്‍ക്കുമുള്ളതെന്നു നമുക്കറിയില്ല. നാം അന്യഗ്രഹവേട്ട ആരംഭിച്ചിട്ട് അമ്പതുവര്‍ഷങ്ങളേ ആയിട്ടുള്ളൂ. ബുദ്ധിമാനെന്ന് സ്വയം അവകാശപ്പെടുന്ന മനുഷ്യന് എത്തിച്ചേരാന്‍ കഴിഞ്ഞത് ഭൂമിക്കപ്പുറം വെറും നാലുലക്ഷം കിലോമീറ്റര്‍ മാത്രം അകലെയുള്ള ചന്ദ്രനിലാണ് എന്ന കാര്യം മറക്കരുത്. ഒരു നക്ഷത്രാന്തര യാത്രചെയ്യാന്‍ ഒരു സഹസ്രാബ്ദത്തിനുള്ളില്‍ മനുഷ്യന് കഴിയുമെന്നു കരുതാനാവില്ല. ഒരുപക്ഷെ അതിനിടയില്‍ മനുഷ്യവര്‍ഗം ഭൂമുഖത്തുനിന്നു തന്നെ അപ്രത്യക്ഷമായേക്കാം. സ്റ്റീഫന്‍ ഹോക്കിംഗിന്റെ പ്രവചനം പോലെയുള്ള അന്യഗ്രഹജീവികളുടെ ഒരു ആക്രമണം ശാസ്ത്രലോകം ഭയപ്പെടുന്നില്ല. എന്നാല്‍ സാങ്കേതികവിദ്യയിലുണ്ടായിക്കൊണ്ടിരിക്കുന്ന അഭൂതപൂര്‍വമായ വളര്‍ച്ച കാരണം ദൂരദര്‍ശിനികള്‍ക്ക് മുമ്പൊന്നുമില്ലാത്തവിധം പ്രകാശവര്‍ഷങ്ങള്‍ അകലെയുള്ള കാഴ്ചകള്‍ വ്യക്തമായി അവതരിപ്പിക്കുന്നതിന് കഴിയും. ഭൗമേതര ജീവന്‍ നേരിട്ടു കാണാന്‍ കഴിയുമെന്നു തന്നെയാണ് ശാസ്ത്രലോകം പ്രതീക്ഷിക്കുന്നത്. വെറും ഇരുപത് വര്‍ഷങ്ങള്‍ മാത്രം കാത്തിരിക്കാനാണ് നാസ പറയുന്നത്.

എന്നാണ് ആദ്യ സമാഗമം?
എന്നാണൊരു ഭൗമേതര ജീവിയെ നമുക്ക് നേരില്‍ കാണാന്‍ കഴിയുക? എന്നാണൊരു വിദൂര നാഗരികതയുമായി നമുക്ക് സന്ദേശങ്ങള്‍ കൈമാറാന്‍ കഴിയുക. അത്തരമൊരു മുഹൂര്‍ത്തം മനുഷ്യവര്‍ഗത്തിന്റെ പരിണാമ ചരിത്രത്തില്‍ ഒരു സുപ്രധാന നാഴികക്കല്ലായിരിക്കുമെന്ന കാര്യത്തില്‍ സംശയമില്ല. ഇനി ഏതെങ്കിലുമൊരു ദിനം ഭൗമേതര ജീവികള്‍ ഭൂമിയെത്തേടിയെത്തി എന്നിരിക്കട്ടെ. എന്തായിരിക്കും അവര്‍ ഭൂമിയെപ്പറ്റി ചിന്തിക്കുക? എന്തായിരിക്കും അവരുടെ ആഗമനോദ്ദേശ്യം? വെറുമൊരു കൗതുകത്തിലുപരി അവരുടെ സന്ദര്‍ശനത്തിന് മറ്റു ലക്ഷ്യങ്ങളെന്തെങ്കിലുമുണ്ടാകുമോ? നോവലുകളിലും സിനിമകളിലും അന്യഗ്രഹജീവികളുടെ സന്ദര്‍ശനത്തിന് വ്യക്തമായ ലക്ഷ്യങ്ങളുണ്ട്. മനുഷ്യനെയും മറ്റു ജന്തുക്കളെയും അവര്‍ ഭക്ഷണമായി ഉപയോഗിക്കാം. ലൈംഗിക ബന്ധത്തിലൂടെ സന്താനോല്പാദനം നടത്താം. ഭൂമി കീഴടക്കി മനുഷ്യരെ മുഴുവന്‍ അടിമകളാക്കാം. ഭൂമിയിലെ വിലപിടിപ്പുള്ള വസ്തുക്കള്‍ കൊള്ളയടിക്കാം. മനുഷ്യനെയും മറ്റു ജന്തുക്കളെയും ബയോളജിക്കല്‍ ബാറ്ററികളായി ഉപയോഗിക്കാം. നിരവധി ലക്ഷ്യങ്ങളാണ് നോവലുകളും സിനിമകളും ചൂണ്ടിക്കാണിക്കുന്നത്. എന്നാല്‍ ഈ സങ്കല്പങ്ങള്‍ക്കൊന്നും ശാസ്ത്രീയമായ യാതൊരു അടിത്തറയില്ലെന്നു മാത്രമല്ല അതിരുകടന്ന ഭാവന മാത്രമാണത്. സിനിമകളില്‍ കാണുന്നതുപോലെ പച്ച ഉടലും വലിയ തലയുമുള്ള ഏറെക്കുറെ മനുഷ്യരൂപമുള്ള ജീവികളായിരിക്കുമോ ഇവര്‍? എങ്ങനെയായിരിക്കും അവരുടെ ബോധമണ്ഡലം പ്രവര്‍ത്തിക്കുന്നത്? ആദ്യം രൂപത്തില്‍നിന്നു തന്നെ തുടങ്ങാം. ഭൂമിയുടെ അന്തരീക്ഷ ഘടനയ്ക്കും, മര്‍ദത്തിനും, ഗുരുത്വബലത്തിനും, കാലാവസ്ഥയ്ക്കുമെല്ലാം അനുകൂലനം ചെയ്യപ്പെട്ടതാണ് ഭൗമജീവന്‍. മനുഷ്യന്‍, മറ്റു ജന്തുക്കള്‍, സസ്യങ്ങള്‍ എന്ന വ്യത്യാസമൊന്നും ഇവിടെ ബാധകമല്ല. എന്നാല്‍ ഭൂമിയുടെ അന്തരീക്ഷഘടനയും ഗുരുത്വബലവുമൊന്നും ഭൗമേതര ഗ്രഹങ്ങള്‍ക്കുണ്ടാവണമെന്നില്ല. അതുകൊണ്ട് അത്തരം ഗ്രഹങ്ങളില്‍ ഉദ്ഭവിച്ച ജീവന് ഭൗമജീവന്റെ രൂപം ആരോപിക്കുന്നതില്‍ അര്‍ഥമില്ലെന്നു മാത്രമല്ല, അതു തെറ്റുമാണ്. മനുഷ്യമസ്തിഷ്‌കത്തിന്റെ ചിന്താശേഷിയും വൈകാരിക തലവുമെല്ലാം അന്യഗ്രഹജീവികള്‍ക്ക് അപരിചിതമായിരിക്കും. അന്യഗ്രഹ ജീവികളുടെ ബോധമണ്ഡലത്തെക്കുറിച്ച് ചിന്തിക്കുന്നതിനു മുമ്പ് മനുഷ്യനല്ലാതെയുള്ള മറ്റു ഭൗമജീവികളുടെ ചിന്താമണ്ഡലത്തേക്കുറിച്ച് ഒന്നു ചിന്തിച്ചുനോക്കുക.

അനിമല്‍ കോണ്‍ഷ്യസ്‌നെസ്
മൃഗങ്ങള്‍ ചിന്തിക്കാറുണ്ടോ? ഉണ്ടെങ്കില്‍ അവ എന്തായിരിക്കും ചിന്തിക്കുന്നത്? ആയിരക്കണക്കിന് വര്‍ഷങ്ങള്‍ക്കു മുമ്പുമുതല്‍ തന്നെ തത്വചിന്തകരെ അലട്ടിയിരുന്ന ചോദ്യമാണിത്. പ്ലൂട്ടാര്‍ക്കും പ്ലിനിയുമെല്ലാം മൃഗബോധത്തേക്കുറിച്ച് നിരവധി പരാമര്‍ശങ്ങള്‍ നടത്തിയിട്ടുണ്ട്. മൃഗബോധവുമായി ബന്ധപ്പെട്ട ഒരു ഉദാഹരണം പരിശോധിക്കാം. ഒരു നായ അവന്റെ യജമാനനെ തേടിനടക്കുകയാണ്. യജമാനന്‍ പോയ വഴി അയാളുടെ മണംപിടിച്ചാണ് നായയുടെ സഞ്ചാരം. അവസാനം നായ ഒരു നാല്‍ക്കവലയിലെത്തിച്ചേര്‍ന്നു. ഇപ്പോള്‍ നായയുടെ മുന്നില്‍ മൂന്നു വഴികളുണ്ട്. ഇവിടെ നായ എന്താണ് ചിന്തിക്കുക? ഇതില്‍ ഏതുവഴിയാണ് നായ (ആദ്യം) തെരഞ്ഞെടുക്കുക? ഒന്നാമത്തെ വഴിയില്‍ കൂടി യാത്രയാരംഭിച്ച നായ ആ വഴിയില്‍ തന്റെ യജമാനന്റെ ഗന്ധമില്ലെന്നുകണ്ട് തിരിച്ചുവന്ന് രണ്ടാമത്തെ വഴിയിലൂടെ യാത്രയാരംഭിക്കും. അവിടെയും തന്റെ യജമാനന്റെ ഗന്ധം തിരിച്ചറിയാന്‍ കഴിയാതെ തിരിച്ചു വീണ്ടും നാല്‍ക്കവലയിലെത്തുന്ന നായ മൂന്നാമത്തെ വഴിയിലൂടെ യാത്ര തുടരുമ്പോള്‍ വീണ്ടും മണത്തുനോക്കുമോ? മണത്തുനോക്കാതെ തന്നെ തന്റെ യജമാനന്‍ ഈ വഴിയിലൂടെയായിരിക്കും പോയിട്ടുണ്ടാവുക എന്നു ചിന്തിക്കാന്‍ നായക്ക് കഴിയുമോ? ഫ്രഞ്ച് ഫിലോസഫറായ മൈക്കല്‍ ഡി മൊണ്ടേയ്ന്‍ പറയുന്നത് നായകള്‍ക്ക് അമൂര്‍ത്ത ചിന്താശേഷി ഉണ്ടെന്നാണ്. എന്നാല്‍ പതിമൂന്നാം നൂറ്റാണ്ടില്‍ ജീവിച്ചിരുന്ന ചിന്തകനായ തോമസ് അക്വിനാസ് ഇതംഗീകരിച്ചിരുന്നില്ല. നൂറ്റാണ്ടുകള്‍ക്കു ശേഷം ചിന്തകരായ ജോണ്‍ ലോക്കും, ജോര്‍ജ് ബെര്‍ക്കിലിയും തമ്മില്‍ ഈ വിഷയത്തില്‍ നിരവധി നാളുകള്‍ ആശയസംവാദം നടത്തുകയുണ്ടായി. മൃഗങ്ങള്‍ക്ക് അമൂര്‍ത്ത ചിന്താശേഷി ഇല്ലെന്ന നിഗമനത്തിലാണ് ഒടുവില്‍ അവര്‍ എത്തിച്ചേര്‍ന്നത്.

ഒരു പൂച്ചയെ നിരീക്ഷിക്കുക. പൂച്ച ആദ്യമായി ഒരു മുറിയില്‍ പ്രവേശിച്ചാല്‍ തറയിലെ കാര്‍പെറ്റിലും ഭിത്തിയിലുമൊക്കെ മാന്തുന്നതു കാണാം. പൂച്ചയെ ദേഷ്യം പിടിപ്പിക്കുന്ന എന്തായിരിക്കും ആ മുറിയിലുണ്ടാവുക? എന്നാല്‍ പൂച്ച തന്റെ അതിരുകള്‍ അടയാളപ്പെടുത്തുകയാണ് ചെയ്യുന്നത്. മറ്റൊരു പൂച്ചയ്ക്ക് അവിടേക്ക് പ്രവേശനമില്ലെന്നുള്ള അടയാളമിടുകയാണ്. അതിരുകള്‍ അടയാളപ്പെടുത്താന്‍ പൂച്ച തന്റെ മലവും മൂത്രവും ഉപയോഗിക്കും. ഇനി പൂച്ച നിങ്ങളുടെ കാലുകളില്‍ മുഖമുരസുകയും മുരളുകയുമൊക്കെ ചെയ്യുമ്പോള്‍ ഓര്‍മിക്കുക. അത് നിങ്ങളോട് സ്‌നേഹം പ്രകടിപ്പിക്കുകയോ നന്ദികാണിക്കുകയോ ചെയ്യുന്നതല്ല. മറിച്ച് നിങ്ങളുടെ ഉടമസ്ഥത പൂച്ച ഏറ്റെടുക്കുകയാണ്. കാര്‍പെറ്റിലും ഭിത്തിയിലും ചെയ്തതുപോലെ തന്നെ പൂച്ച നിങ്ങളെ അടിമയാക്കുകയാണ്. നിങ്ങളെ യജമാനനായി അംഗീകരിക്കുകയല്ല ചെയ്യുന്നത്. പൂച്ചയുടെ ദൃഷ്ടിയില്‍ നിങ്ങള്‍ അവന്റെ അടിമയും വേലക്കാരനുമാണ്. നിത്യേന നല്ല ഭക്ഷണവും പാര്‍പ്പിടവുമൊരുക്കുന്ന വേലക്കാരനാണ് നിങ്ങള്‍. മറ്റു പൂച്ചകള്‍ നിങ്ങളെ സ്വന്തമാക്കാതിരിക്കാനാണ് പൂച്ച ഇടയ്ക്കിടെ ഉരസലിലൂടെ നിങ്ങളുടെ ശരീരത്തില്‍ ഹോര്‍മോണുകള്‍ നിക്ഷേപിക്കുന്നത്. പൂച്ചയുടെ കൂടെ കളിക്കുമ്പോള്‍ നിങ്ങള്‍ക്കു പറയാന്‍ കഴിയുമോ, പൂച്ച നിങ്ങളെ കളിപ്പിക്കുകയല്ലെന്ന്? ഇനി പൂച്ചയ്ക്കു പകരം ഒരു വവ്വാലായാലോ, ഡോള്‍ഫിനെ ഒക്കെയാണെങ്കിലോ? അവയുടെ ചിന്താധാര പാടെ വ്യത്യസ്തമായിരിക്കും. ഭൗമജീവന്റെ ഭാഗമായ മൃഗബോധം പോലും മനുഷ്യമസ്തിഷ്‌കത്തിന്റെ ചിന്താധാരയ്ക്കപ്പുറമാകുമ്പോള്‍ അന്യഗ്രഹജീവികള്‍ക്ക് മാനുഷിക വികാരങ്ങളും വിചാരങ്ങളുമെല്ലാം ഉണ്ടാകുമെന്ന് കരുതാനാവില്ല.

മിസ് യൂണിവേഴ്‌സ്, മിസ്റ്റര്‍ യൂണിവേഴ്‌സ്
അന്യഗ്രഹജീവികള്‍ ബുദ്ധിവികാസം പ്രാപിച്ചവയാണെങ്കില്‍ അവ താരതമ്യേന ചെറിയ ജീവികളായിരിക്കും. ബുദ്ധിവളര്‍ച്ച പ്രാപിച്ച ജീവികള്‍ വേട്ടക്കാരും ബുദ്ധികുറഞ്ഞവര്‍ ഇരകളുമായിരിക്കും. കാട്ടിലെ വേട്ടക്കാരെത്തന്നെ നോക്കാം. സിംഹവും കടുവയുമെല്ലാം വേട്ടക്കാരാണ്. കാട്ടുപോത്തും ജിറാഫുമെല്ലാം അവയേക്കാള്‍ വലിയ ജീവികളാണ്. എന്നാല്‍ അവ ഇരകളുമാണ്. ഇരകള്‍ക്ക് ബുദ്ധിവളര്‍ച്ച കുറവും വലിപ്പം കൂടുതലുമായിരിക്കും. അതായത് ബുദ്ധിവളര്‍ച്ച പ്രാപിച്ച ജീവികള്‍ ചെറുതും ബുദ്ധി കുറഞ്ഞവ വലുതുമായിരിക്കും. വേട്ടക്കാരുടെ കണ്ണുകള്‍ മുഖത്തിന്റെ മുന്‍ഭാഗത്തായിരിക്കും. ഇരയുടെ ത്രിമാന സ്റ്റീരിയോവിഷന്‍ ചിത്രം ലഭിക്കുന്നതിനു വേണ്ടിയാണിത്. വേട്ടക്കാരനും ഇരയും തമ്മിലുള്ള അകലം കൃത്യമായി നിര്‍ണയിക്കുന്നതിനും ഇതു സഹായിക്കും. ഇരകളുടെ കണ്ണുകള്‍ മുഖത്തിന്റെ ഇരുവശങ്ങളിലുമായാണ് കാണപ്പെടുന്നത്. വേട്ടക്കാരനെ ഇരുഭാഗത്തുനിന്നും കാണുന്നതിനു വേണ്ടിയാണ് ഈ അനുകൂലനം. ഇനി മനുഷ്യന്റെ കാര്യം പരിഗണിച്ചാല്‍ എങ്ങനെയാണ് അവന്‍ മറ്റു ഭൗമജീവികളെ അപേക്ഷിച്ച് കൂടുതല്‍ ബുദ്ധിമാനായത്? എന്തെല്ലാം ശാരീരിക പ്രത്യേകതകളാണ് മനുഷ്യന്റെ മസ്തിഷ്‌ക വികാസത്തിന് ഉല്‍പ്രേരകമായത് എന്നു നോക്കാം. കുറഞ്ഞത് മൂന്നു ഘടകങ്ങളെങ്കിലും മനുഷ്യന്റെ ബുദ്ധിവികാസത്തെ സ്വാധീനിച്ചിട്ടുണ്ട്.

1. മറ്റു വിരലുകള്‍ക്ക് അഭിമുഖമായി നില്‍ക്കുന്ന തള്ളവിരല്‍. ഉപകരണങ്ങള്‍ നിര്‍മിക്കുന്നതിനും ഉപയോഗിക്കുന്നതിനും ഇത് മനുഷ്യന് സഹായകരമായിത്തീര്‍ന്നു.

2. വസ്തുക്കളുടെ ത്രിമാനരൂപം നല്‍കാന്‍ കഴിയുന്ന സ്റ്റീരിയോ നേത്രങ്ങള്‍

3. ഭാഷ

ഈ മൂന്നു ശേഷികളാണ് മനുഷ്യനെ ഭൗമജീവന്റെ നേതൃസ്ഥാനത്തെത്തിച്ചത്. ഭൗമേതര നാഗരികതയിലെ ബുദ്ധിവളര്‍ച്ച പ്രാപിച്ച ജീവികളെപ്പറ്റി പറയുമ്പോഴും ഇത്തരം ശാരീരിക സവിശേഷതകള്‍ പരിഗണിക്കേണ്ടിവരും. എന്നാല്‍ അവിടെയും ചില പ്രശ്‌നങ്ങളുണ്ട്. ഭൗമജീവന്റെ ഉദ്ഭവത്തിനു കാരണം സൂര്യന്‍ എന്ന മാതൃനക്ഷത്രത്തിന്റെ സാന്നിധ്യമാണ്. ജീവനുദ്ഭവിക്കുന്നതിനും നിലനില്‍ക്കുന്നതിനുമുള്ള താപം പ്രദാനം ചെയ്യുന്നത് സൂര്യനാണ്. സൗരയൂഥത്തില്‍ തന്നെ ജീവനുദ്ഭവിക്കാന്‍ സാധ്യതയുള്ള ഗോളങ്ങളാണ് വ്യാഴത്തിന്റെ ഉപഗ്രഹമായ യൂറോപയും ശനിയുടെ ചന്ദ്രനായ ടൈറ്റനും. ഈ രണ്ടു ഗോളങ്ങളും സൂര്യന്റെ വാസയോഗ്യ മേഖലയിലല്ല സ്ഥിതിചെയ്യുന്നത്. എന്നിരുന്നാലും ഈ രണ്ടു ഗോളങ്ങളിലും ദ്രാവകസമുദ്രങ്ങളും ജീവന്‍ നിലനില്‍ക്കുന്നതിനാവശ്യമായ താപവുമുണ്ട്. ദ്രാവകസമുദ്രം സ്ഥിതിചെയ്യുന്നത് ഉപരിതല പാളിക്കു കീഴെയാണ്. അതിനാവശ്യമായ താപം ലഭിക്കുന്നത് സൂര്യനില്‍നിന്നല്ല. വ്യാഴത്തിന്റെയും ശനിയുടെയും ടൈഡല്‍ ബലങ്ങളാണ് അവയുടെ ഉപഗ്രഹങ്ങള്‍ക്ക് താപം പ്രദാനം ചെയ്യുന്നത്. ഭൗമേതര ജീവന്റെ കാര്യത്തില്‍ ഇത്തരം ടൈഡല്‍ ബലങ്ങള്‍ക്ക് വളരെ പ്രാധാന്യമുണ്ട്. അങ്ങനെ നോക്കുമ്പോള്‍ ഈ പ്രപഞ്ചത്തിലെ മിസ്റ്റര്‍മാരും മിസുമാരുമെല്ലാം മനുഷ്യരൂപത്തിലാകണമെന്ന് വാശിപിടിക്കരുത്.

ഭൗമേതര ജീവന്‍ ഏതുനിമിഷവും കണ്ടെത്തപ്പെടാം. എന്നാല്‍ ഭൗമേതര ജീവികളുടെ രൂപവും പ്രകൃതവുമൊന്നും പ്രവചിക്കാന്‍ കഴിയില്ല. അവര്‍ക്ക് മാനുഷിക വികാരങ്ങളും ഉണ്ടാകില്ല. അവരുടെ സാമൂഹിക ജീവിതക്രമവും നിയമങ്ങളുമെല്ലാം മനുഷ്യന് വിചിത്രമായി തോന്നാം. പക്ഷെ ഒന്നുറപ്പിക്കാം. ഈ മഹാപ്രപഞ്ചത്തില്‍ നാം തനിച്ചല്ല. ജീവന്റെ ഉന്മാദനൃത്തം ചവിട്ടുന്ന ഭൂമിക്ക് ഒരു സഹജയെ ഏതുനിമിഷവും ലഭിക്കാം. തെളിവുകളുടെ അഭാവം അങ്ങനെയൊന്നില്ല എന്നതിന്റെ തെളിവല്ല, മറിച്ച് മനുഷ്യവര്‍ഗം ആര്‍ജിച്ച സാങ്കേതികവിദ്യയുടെ പരിമിതി മാത്രമാണ്. ആ പരിമിതി മറികടക്കാന്‍ ഇനി അധികനാള്‍ കാത്തിരിക്കേണ്ടിവരില്ല. ഈ തലമുറയ്ക്കു തന്നെ അന്യഗ്രഹജീവികളെ നേരില്‍ കാണാനുള്ള ഭാഗ്യമുണ്ടാകും. ഈ രംഗത്ത് പ്രവര്‍ത്തിക്കുന്ന ശാസ്ത്രജ്ഞര്‍ അതുറപ്പുതരുന്നുണ്ട്. ഏതുനിമിഷവും അത്തരമൊരു വാര്‍ത്ത പ്രതീക്ഷിക്കാം. ഭൗമേതര ജീവന്‍ തൊട്ടടുത്തുതന്നെയുണ്ട്… കൈയെത്തും ദൂരത്തുതന്നെ.

Facebook Comments

About admin

Leave a Reply

Your email address will not be published. Required fields are marked *

*